NM skiskyting i 2019 til Ål og Liatoppen!

Norges Skiskytterforbund har i dag tildelt NM i skiskyting i 2019 til Ål skiskytterlag og Liatoppen skisenter som arena. Ål skiskytterlag arrangerer årleg verdas største skiskyttarrenn - Bendit Liatoppen skiskytterfestival - med 1100 deltakarar. I 2019 blir det lagt opp til ei festveke på Ål for norsk skiskyting med NM senior og norgescupfinalar for junior og Liatoppen skiskytterfestival fordelt på to påfølgjande helger.

Arrangøren vil arbeide for å setje skiskyttaridretten i fokus i denne perioden og ser fram til å ta i mot "heile" skiskytter-Norge på Liatoppen og Ål på ettervinteren i 2019.

Ål skiskytterlag arrangerte NM også i 2001.

Ole Einar Bjørndalen vann den gongen kongepokalen. Stiller han til start i 2019?

I 2001 var Hellbillies-medlem Arne Moslåtten NM-skald. Han ønskte alle velkomen til Ål på denne måten:

Velkomen hit sko de alle vera

om de sko sjå på ell børse bera.

På Liatoppen skal slaga stå.

Koss det vil enda kan ingen spå.

Men gjæve gutar og spreke jenter

skal skøyta fram over myr og skrenter.

Me høyrer jubelen like hit,

når blinken skiftar frå svart til kvit.

Med ladd gevær og på glatte skier

skal kampen bølgja i bjørkelier.

Frå slott og småbruk me samlast her,

til Norgesmeistrane kåra er.

Ål skiskytterlag og Liatoppen skisenter ser fram til å ta imot deltakarar og publikum på NM i 2019.